Hér er hægt að finna að mestu þau forrit sem eru og hafa verið notuð við vinnslu þeirra verkefna sem má finna á síðunni. Mörg þeirra eru opinn hugbúnaður sem hægt er að fá ókeypis en sum þarf að kaupa sér aðgang að. Ef þú smellir á táknin sem hér fylgja áttu að komast á heimasíður þessara forrita, gangageymslna og annars hugbúnaðar.

 

 

 

 

 

Ýmis forrit er hægt að fá ókeypis á Netinu og nota í grunnskólastarfi. Þetta eru forrit sem taka ekki mikið geymslupláss í tölvum og er jafnframt auðvelt að hlaða niður í einkatölvur. Það sem nemendur læra í skólanum geta þeir farið með heim og bjargað sér sjálfir um viðeigandi hugbúnað, án þess að leggja út í mikinn kostnað ef þá nokkurn. Forritin sem hér hafa verið valin til þess að nota í þessu verkefni eru forrit sem hafa reynst vel í skólastarfi og nemendur eiga auðvelt með að tileinka sér. Samkvæmt námskrá í upplýsingatækni þurfa nemendur að geta unnið ýmis verkefni í forritum svo sem með ljósmyndir, hljóð og texta.

Til að eiga við ljósmyndir varð fyrir valinu ljósmyndaforritið IrfanView 4.10 (sjá http://www.irfanview.com ). Forritið er auðvelt í uppsetningu og með fáa en skýra valkosti til að vinna með. Þetta er byrjendaforrit sem auðvelt er að læra á. Forritið gengur bæði á tölvur sem nota Windows- og Mac-stýrikerfi.

Þá varð fyrir valinu hljóðvinnsluforritið Audacity 1.2.4 (sjá http://audacity.sourceforge.net ) sem er einnig auðvelt að hlaða niður í einkatölvur og einfalt að vinna með. Þetta forrit gengur bæði á tölvur sem nota Windows- og Mac-stýrikerfi.

Að lokum varð fyrir valinu að nota forritið Photostory 3 fyrir Windows. (sjá http://www.microsoft.com/windowsxp/using/digitalphotography/PhotoStory/default.mspx ). Þetta forrit er búið að hlaða niður á margar tölvur með Windows-kerfinu þegar þær eru keyptar, einnig getur eigandi PC-tölvu hlaðið þessu niður sjálfur. Þetta forrit gengur ekki fyrir Apple umhverfið (sjá http://www.apple.com ). Sambærilegt forrit fyrir slíka tölvur hjá þeim er ekki til, eins og staðan þar er í dag.

Hvað ritvinnslu varðar í þessu verkefni er reiknað með að nemendur hafi aðgang að hugbúnaðarsafninu Microsoft Office (sjá http://office.microsoft.com ) en þegar til framtíðar

litið er vert fyrir grunnskóla að skoða hugbúnaðarsafn eins og Open Office (sjá http://www.openoffice.org ) sem býður upp á alla möguleika sem grunnskólanemendur þurfa á að halda í sinni vinnu.

Þegar til litið er til framtíðar má hugsa sér að gera kennara og nemendur hæfari í upplýsingatækni með því að prófa og nota annan opinn hugbúnað en hér hefur verið nefndur til sögunnar. Þar má nefna t.d. ritvinnslu sem hægt er að inna af hendi beint á Netinu eins og hjá Google Docs (sjá http://docs.google.com ). Þegar þetta er skrifað er Google að setja fram nýjan samskiptavettvang, Google Wave, (sjá http://wave.google.com ). Hann hljómar spennandi en það á að vera hægt að hafa samskipti eins og með tölvupósti, með umræðum og fleira í rauntíma. Það verður spennandi að fylgjast með því hvernig þetta þróast og hvort grunnskólaumhverfið sér sér hag í að nota slíkt verkfæri fyrir og með nemendum.

Þá er einnig til gott ljósmyndaforrit sem höfundur hefur reynslu af, Paint.net (sjá http://www.paint.net ). Það er einfalt og auðvelt að nota í grunnskólastarfi. Þetta forrit er nokkuð flóknara en IrfanView og mætti hugsa sér að nota það í efstu bekkjum grunnskólans. Þá má einnig líta til þess að nemendur nýti sér forrit eins og Windows Movie Maker (http://www.microsoft.com/windowsxp/downloads/updates/moviemaker2.mspx ) og Camstudio (sjá http://camstudio.org ).

Í fjölbreytileika dagsins, eru alltaf að koma fram ný forrit og nýr hugbúnaður. Kennarar sem og aðrir í samfélaginu mega hafa sig alla við að fylgjast með þróuninni á upplýsingatæknisviðinu. Því má leiða líkum að því að nemendur sem fá innsýn í tæknina og læra að vinna með hana, eigi auðveldara með að tileinka sér nýja tækni og jafnframt að meta á einhvern hátt það sem er í boði hverju sinni.